Mōhiohio mā ngā mātua / kaitiaki

 

Tēnā koe mōu i rēhita mai i tō tamaiti ki te hōtaka o Kia Māia te Whai 2018 – 2019.

Ka tautoko koe i tō tamaiti mā te āwhina i a ia:

  • Ki te tiaki, te whakapakari hoki i ōna pūkenga pānui
  • Ki te whakatipu i tōna ngākau nui ki ngā pukapuka me te pānui
  • Ki te whai wheako motuhake i te reoruatanga, i te ahurea Māori hoki ki Aotearoa nei
  • Kia māia, kia taunga tana whakamahi i ngā pātaka kōrero
  • Kia pārekareka, kia harikoa ngā hararei o te raumati

Ngā tohutohu mā ngā mātua / kaitiaki


E mihi ana ki tō hiahia, tō kaikā ki te tautoko i tō tamaiti ki te whakawhanake i tōna ao pānui. Anei ētahi tohutohu hei āwhina i a koe ki te whakahau i tō tamaiti ki te pānui pukapuka:

Kia pārekareka te pānui

Whakaritea tētahi pō ka noho tahi te whānau ki te pānui pukapuka, inu tiakarete wera me ngā pihikete, te whakaari tahi i tētahi pūrākau rānei.

Me pānui tahi te whānau katoa

Me pānui tahi koutou ko ngā tamariki, ahakoa te poto, me mahi i ia rā.

Whakawhiti kōrero ki āu tamariki

Kōrero atu ki a rātou mō ā rātou mahi i a rātou e nohinohi ana, i a koe e tamariki ana, he tirotiro whakaahua o mua rānei.

Whakatauirahia

Ki te pānui pukapuka koe, ka kaha ake te hiahia o te tamaiti ki te pānui. Mehemea kāhore koe e pānui pukapuka i ia rā, me akiaki koe i a rātou ki te pānui, ki te kōrero rānei mō ngā pukapuka kua pānuihia e rātou.

Whakanuia, ākina tāu tamaiti

Ākina tō tamaiti ki te whiriwhiri i āna ake pukapuka, māu rānei ētahi pukapuka rerekē e tohu hei kōwhiringa māna.
Ki te tīmata tō tamaiti ki te pānui i tētahi pukapuka, engari kāhore e oti i a ia te katoa te pānui, e pai ana. Me mihi tonu i tōna ngana, ahakoa te pakeke o te pukapuka.

Tūhuratia ngā takoha a Ngā Pātaka Kōrero!

Ehara i te mea ko te pukapuka anake; arā noa atu ngā puoro, ngā kiriata, ngā panga, ngā mōhini, ngā iPukapuka ā-oro, tae atu ki ngā rauemi matihiko māu hei tūhura.

Toro atu ki ō tātou pātaka kōrero, puta noa i Tāmaki Makaurau, tirohia rānei tā tātou paetukutuku mō ētahi atu kōrero.

Kaua e wareware, haria atu āu tamariki ki te pātaka kōrero, whakaatu ai i te haere o ana mahi, tuku kōrero, pātai rānei.

Ka hīkaka mātou te kite i a koutou ko tō whānau i ēnei hararei raumati, ā, haere ake nei.

Ki te hiahia koe ki te ‘tū tono’ i roto i te reo Māori mō ngā whāinga kua tutuki, waea atu ki 09 377 0209 ki te tono hui.